Ingingo ya 27
Inshingano z’urwego rugenzura mu byerekeye kurinda amakuru bwite n’imibereho bwite by’umuntu
Urwego rugenzura rufite inshingano zikurikira:
1. gukurikirana ishyirwa mu bikorwa ry'iri tegeko;
2. gusubiza buri busabe bufite ishingiro busaba inama ku itunganywa ry'amakuru bwite;
3. kumenyesha nyiri ubwite, umugenzuzi w'amakuru n’utunganya amakuru n'undi muntu uburenganzira n'inshingano byabo;
4. gushyiraho igitabo cyandikwamo abagenzuzi b’amakuru n’abatunganya amakuru;
5. gusuzuma byimbitse ishingiro ry’ikibazo cyerekeranye n’itunganywa ry’amakuru bwite cyatanzwe na nyiri ubwite, umugenzuzi w’amakuru, utunganya amakuru cyangwa undi muntu no kubamenyesha mu gihe gikwiye ibyavuye muri iryo suzuma;
6. kwakira no gusuzuma ubujurire bwa nyiri ubwite;
7. gutanga inama mu byerekeye kurinda amakuru bwite n'imibereho bwite by'umuntu;
8. kugira imikoranire n’inzego, imiryango cyangwa ibigo bikorera mu Gihugu no mu mahanga mu kurinda amakuru bwite n’imibereho bwite by’umuntu.
Ingingo ya 28
Ububasha bw’urwego rugenzura mu byerekeye kurinda amakuru bwite n’imibereho bwite by’umuntu
Urwego rugenzura rufite ububasha bwo:
1. gutanga icyemezo cy’iyandikwa nk’uko biteganywa n’iri tegeko;
2. kumenya no kugenzura ko gutunganya amakuru bwite bikorwa hakurikijweibiteganywa n’iri tegeko;
3. kumenya no kugenzura ko ikoranabuhanga mu itangazabumenyi n’itumanaho bitaba imbogamizi ku burenganzira n’imibereho bwite by’umuntu;
4. gushyiraho amabwiriza arebana no gushyira mu bikorwa iri tegeko;
5. gutanga ibihano byo mu rwego rw’ubutegetsi hakurikijwe ibiteganywa n’iri tegeko.